ගෝලීය ශිෂ්ටාචාර අතර සංවාද දිනයේ පළමු සංවත්සරය සැමරීම සඳහා ඇමරිකාවේ නිව්යෝර්ක් හි එක්සත් ජාතීන්ගේ මූලස්ථානයේ දී ඊයේ (10) දින උත්සව මාලාවක් පැවැත්විණ.
ශිෂ්ටාචාර සඳහා වන එක්සත් ජාතීන්ගේ සන්ධානය ඇතුළු එහි ස්ථිර දූත මණ්ඩල සාමාජික රටවල් වන චීන, ඊජිප්තු, පේරු, ස්පාඤ්ඤ සහ උස්බෙකිස්තාන නියෝජිතයින්ගේ මූලිකත්වයෙන් සංවිධාන කරන ලද මෙම වැඩසටහන් අතර, “ශිෂ්ටාචාර අතර සංවාදය ප්‍රවර්ධනය කිරීම, ගෝලීය සහයෝගීතාවය සහ සහයෝගීතාව ශක්තිමත් කිරීම” යන තේමාව යටතේ සංවාදයක් ද පැවැත්විණ.
චීන විදේශ අමාත්‍ය Wang Yi මහතා මෙම සංවාදයේ දී වීඩියෝ පණිවුඩයක් ඉදිරිපත් කළ අතර, එහිදී ඔහු ඉල්ලා සිටියේ, සමානාත්මතාවය ආරක්ෂා කිරීමට සහ අන්තර් සංස්කෘතික හුවමාරුව ප්‍රවර්ධනය කිරීමට උත්සාහ කරන ලෙස ය.
එක්සත් ජාතීන්ගේ මහලේකම් Antonio Guterres මහතා ද මෙම අවස්ථාව වෙනුවෙන් පණිවුඩයක් එක් කරමින් සඳහන් කළේ, අවබෝධය සහ විශ්වාසයේ පාලම් ගොඩනැගීම සඳහා සංවාදය අත්‍යවශ්‍ය බව ය.
මෙහිදී අදහස් පළ කළ එක්සත් ජාතීන්ගේ මහා මණ්ඩල සභාපති Philemon Yang මහතා එක්සත් ජාතීන්ගේ ප්‍රඥප්තියේ පරමාදර්ශ සහ මූලධර්මවලට නැවත කැපවීමේ අවශ්‍යතාව අවධාරණය කළේ ය.
එමෙන්ම සැමට වඩාත් යහපත් වූ ලෝකයක් වෙනුවෙන්, ඉවසීම මෙන්ම සංවාදය ප්‍රවර්ධනය කළ යුතු බවද ඔහු වැඩිදුරටත් සඳහන් කර ඇත.
චීනය විසින් ඉදිරිපත් කරන ලද සහ රටවල් 80 කට අධික සංඛ්‍යාවක් විසින් සම අනුග්‍රහය දක්වන ලද යෝජනාවක්, පසුගිය වසරේ එක්සත් ජාතීන්ගේ මහා මණ්ඩලය විසින් සම්මත කිරීමත් සමඟ ජුනි 10 වන දින ගෝලීය ශිෂ්ටාචාර අතර සංවාද සඳහා වූ ජාත්‍යන්තර දිනය ලෙස නම් කිරීම සිදු විය.
